DAGUPAN CITY—Sakey lamet ya ogaw ya abakunaan na kontrobersiyal na dengvaxia so inatey kasumpalan ya aturukan na iya diad sakey ya eskuwelaan ed Pampanga.
Say 12 anyos ya ogaw so abakunaan sa nen June 14, 2016 diad San Esteban Elementary School ed Macabebe Pampanga.
Manaayam so abitlan ogaw diad Sapang Kawayan ya kaabay na baley na Masantol tan atukoy ya awalaan na brain herniation syndrome.
Awalaan na petang tan panateng so abitlan ogaw sa nen January 14, untan met akaliknay pansakit na ulo tan pan-uta antes ya inawit diad Jose B. Lingad Memorial Regional Hospital (JBLMRH) nen January 17.
Ginawa so inpaniksamin piyan naantaan no inatey so abitlan ogaw lapud dengue.
Akabatan ya duwaran eskuwela manlalapud Guagua tan Candaba Pampanga so inatey tan kabiangan irad saray abakunaan ng dengvaxia vaccine.
