DAGUPAN CITY– Paplanuen na sakey ed saray akaloob ed 12 Finalists na Bombo Music Festival 2019 ya manpagawa na music o recording studio no man bilang saya so makaawat na sakey ed say taloran major prizes.
Saya so impalapag tonya ed eksklusibon impituyaw na Bombo Radyo Dagupan ed kinen Jessan May Mirador ya tubon Sta. Barbara, Pangasinan ya angansyon na walay pamagat ya “Taken na si crush”.
Inkuwanton, panpagawa to na music o recording studio so napanaluan to no sikato so makala na sakey ed taloran major prizes na Bombo Music Festival 2019.
Onong ed 30-anyos ya marikit, say istorya na kansyon to et nilirad sakey ya bii ya walay crush balet agla ya manaya single.
Inkuwan nen Mirador, ya mabetbet ton narengel ed saray kakaaro to tan arum ya too so salitan “taken na si crush” kanyan anonotan ton igawaan to na istorya.
Bilang sakey ya composer , nakaokolan to nin makalay experience diad arum ya too tan agga nakaokolan ya istoryay bilay to so isulat ton kansyon.
Say payo to ed saray walay ambisyon ed larangan na musika ya mansulat na anggan diad melag ya papel na saray walad nonot da tan undagop ed saray song writing camp ta nakaokolan ya naebel ni so talento na balang sinansakey.
