DAGUPAN CITY– Kinumpirma na Manaoag PNP ya sakey ya notoryus ya holdaper tan miyembro ng gun-for hire group so sakey ed saray duwaran lalakin apatey kasumpalan ya aka-engkwentro na kapulisan diad baley na Manaoag, Pangasinan.
Kinabat so sakey ed saray suspek ya si Ramon Lavigan, Top 5 most wanted person diad baley na Mapandan tan ibabagan sakey ya notoryus ya holdaper tan miyembro na gun for hire group ya man-ooperate diad luyag legan ya agni kabat na saray otoridad so kaiba tonya.
Immunad saya, inalerto na Criminal Investigation and Detection Group o CIDG so Manaoag PNP ya walay aanapen dan top 5 most wanted person kanyan nangaway check-point iray pupulis diad saray lugar ya nayarin dalanen na saray suspek.
Diad eksklusibon impituyaw na Bombo Radyo Dagupan ed kinen PCI Dave Mahilum, hepe na Manaoag PNP, impalapag tonya ya nan-holdap niray suspek na truck diad Coastal Road ed Brgy. Poblacion diad abitlan baley.
Nen akorner da balet so duwaran suspek so akipaltugan irad pupulis ya nanresulta na inateyan da.
Kaleganan tonya, mitotongtong la so Manaoag PNP ed Mapandan PNP piyan nabirbir so kaiba na suspek ya si Lavigan tan pian naipakabat ed pamilya to S so agawad suspek.
