DAGUPAN CITY– Papagaan na Provincial Health Office (PHO) Pangasinan, ya untagey so bilang na aray firecraker related injuries legan ya manasingger so pangabet na taon 2019.
Saya so impalapag nen Dra. Ana Marie De Guzman, Provincial Health Officer diad luyag na Pangasinan, diad impituyaw na Bombo Radyo Dagupan, kasumpalan ya naikurit so mikatlon biktima na paputok ya sakey ya taloy taon ya ogaw ya abuntukan na paputok legan ya manggagalaw.
Onong ed opisyal, nen imbeneg ya Pasko nen 2017, sakey labat so naikurit ya aputukan bangbalet natan anggapo ni bisperas na balon taon so akapangikurit la na taloran kaso.
Inyarum ni nen Dra. De Guzman, posiblen untagey ni bilang na aray biktima no mansansian bangar iray totoo tan manpatuloy so pangusar da na paputok.
Tinangguyor met na opisyal so publiko ya mangusar na community fireworks display o aray alternatibon paraan na pangaway ingal singa say panusar na totot o panpatanol na aray aderal ya kaldero.
