DAGUPAN CITY– Imporek na National Food Authority o NFA Region 1 ya first come-first served basis so proseso na panlalako na NFA Rice diad saray accredited retailers.
Diad eksklusibon impituyaw na Bombo Radyo Dagupan ed kinen NFA Region1 Director Jaime Hadlocon, impalapag to ya anggapo so paiiralen na NFA ya nayarin magpa-reserve so sakey ya managsaliw na NFA rice anggano agla unpila ta diad katuwaan to no siopa so plimeron sinmabi tan pinmila so sikato so unaan ya nalakuan na mamuran belas.
Inkuwanton malinew ya pansumlang ed ley so gagaween ya panpareserve ta anggapo met so talagan reservation ed say panlako na NFA rice.
No wala man bilang so mangagawa ed saya, imbaga ni Hadlocon ya anggapo so anta diya na NFA no ingen kagagawa na sakey ya accredited retailer.
