DAGUPAN CITY -Pan-aaralan natan na Philippine Army 7th Infantry Division tan pigaran government Officials ya gaween ya insurgency free ed saray rebelden New People’s Army (NPA) o luyag na Pangasinan.
Atibokel so abitlan plano kasumpalan ya anggapo lay namomonitor so militar tan pupulis na presensya o sightings na saray rebelden grupo ed interon probinsya.
Likod nidsaya, anengneng na saray taklay na oley so kareenan tan uksoy na Pangasinan anggan say malaknaban ya development na probinsya.
No nanonotan sa nen Hunyo 13 2018 pinirmaan na Pangasinan Police Provincial Office so rekomendasyon na 702nd Brigade ya gaween ya insurgency free so luyag lapud anengneng da so amin ya parameters o basehan na abitlan deklarasyon.
Manilalo so lokal ya gobyerno ya naideklaran insurgency free so probinsya antes nin nasumpal so taon 2018.
