Dagupan City – Nag-force harvest na ang mga magbabangus sa lalawigan ng Pangasinan bago pa man manasala ang bagyong Opong.
Ito ang ibinahaging estratehiya ni Christopher Aldo Sibayan, presidente ng Samahang Magbabangus sa Pangasinan sa naging panayam sa kaniya ng Bombo Radyo Dagupan.
Aniya, dahil kasi sa ginawang hakbang ay bumaba na ang naitalang pinsala sa sektor kumpara sa inaasahang maitatala kung hindi ginawa ang hakbang.
Sa katunayan ani Sibayan, isa sa kanilang ginawa ay ang paglalagay ng mga nets upang sakaling umapaw ang lebel ng tubig dala ng tuloy-tuloy na pag-ulan dahil sa naranasang bagyo ay hindi umapaw o makawala ang mga bangus/
Isa naman sa inaasahan nila ay ang pagiging mas stable ng suplay ng bangus sa harvest season.
Gayunman, nilinaw niya na hindi lamang ulan o taas ng tubig ang sukatan ng produksyon, kaya’t patuloy pa rin ang pagsusuri sa posibilidad ng pagtaas o pagbaba ng suplay.
Sa usapin ng kalidad, binigyang-diin ni Sibayan na dekalidad pa rin ang bangus sa Pangasinan at ang kaibahan na lamang sa ibang lugar ay timbang at laki.
Hindi lamang aniya bayan ng Binmaley ang apektado ng pagbaba ng produksyon kundi maging ang ibang bayan sa lalawigan.
Dahil dito, nakikipag-ugnayan na sila sa Bureau of Fisheries and Aquatic Resources (BFAR) upang makapagbigay ng karampatang tulong sa mga apektadong magbababangus.
Ayon kay Sibayan, malaki kasi ang ibinaba ng produksyon dahil sa matataas na lebel ng baha na sumira sa mga fingerlings, dahilan upang manawagan siya sa pamahalaan na palakasin ang suporta sa sektor ng aquaculture, lalo na sa aspeto ng disaster preparedness at flood mitigation.
Isa sa mga inihahandang programa ng samahan ay ang pagpapalakas ng lokal na produksyon, kaya’t umaasa silang magkakaroon ng agarang aksyon at resulta mula sa mga kinauukulan.
