DAGUPAN CITY– Inamin na Pangasinan Police Provincial Office ya naiirapan ira ed kampanya kontrad illegal ya droga diad luyag.
Saya et makalanor undadakel ya bilang na aray indibidwal ya sangkot diad iligal ya aktibidad.
Diad ekslusibon impituyaw na Bombo Radyo Dagupan ed kinen Police Senior Supt Wilson Lopez, Provincial Director diad luyag, imbaga ton mairap so gagaween ya operasyon.
Inkuwanton, ungragrabe so sitwasyon lautla mairap so panaresto ed pigaran personalidad.
Diad katuwaan to, inmabot la ed sanlibo so bilang na operasyon ya gagaween dad probinsya.
Nilira ed saya, mansasansian positibo so Pangasinan Police Provincial Office tan nanpormisan mas tutukan da so giyera kontra-droga.
Determinado so hanay da ya naerep tan naerel iray indibiwal ya sangkot diad abitlan isyu.
