DAGUPAN CITY- Inatey so pitoy taon ya Grade 1 pupil kasumpalan ya nalner diad baley na Malasiqui, Pangasinan.
Kinabat so biktima ya si Rengie Aquino, pitoy taon tan residente na Barangay Talospatang diad baley na Malasiqui.
Onong ed say ama na biktima ya kinabat ya si Raymundo Aquino Jr., walad suston edad, tan residente ed abitlan lugar, agto la asabian diad abong da so anak to kanyan inanap to ed sakey ya anak to.
Imbaga ton walad eskuwelaan tan mangagalaw.
Nen agni nalmo so ogaw, nantepet lamet so ama na biktima anggad kinmerew metla na tulong ed saray barangay officials insan da naantaan ya aksidenten naplag diad ilog legan ya migagalaw ed saray agagi tan kapinsan to.
Nangawa na search tan rescue operation so PNP kaiba so MDRRMO diad baley na Malasiqui insan da anengneng so laman ton manlulutang diad ilog.
Inawit niya ed ospital bangbalet saya so indeklaran inatey na saray doktor.
Kaleganan tonya, patuloy so imbestigasyon na saray pulis piyan nasiguro anggapoy foul play ed impatey na biktima.
Kaleganan tonya, anta la na sakey ya anak to ya naplag diad ilog balet agto imbaga ed say ama to.
