DAGUPAN CITY– Aantaen la na PNP no siopa so makangawa na tan nanusar na numeron nanpawit na bomb threat ya nanbulabog ed saray campus na University of Luzon diad ciudad na Dagupan tan diad baley na Pozorrubio.
Saya so impasiguro nen PSupt John Dale Sulit, hepe na Dagupan City PNP.
Imporek ton agda palampasen so insidente tan kasuan da so toon nangawa na sayan pantaktakot.
Inkuwanton aliwan lurey so insidente ta inbana dad eksamin komon na saray estudyante na University of Luzon ya agla atuloy makasengeg ed bomb threat.
Onong ed report, pigaran estudyante tan atateng danya tan saray mamaestra na University of Luzon so akaawat na text message ya mangibabagan walay tigtataloran bomba ya akakarga diad saray pigaran kuwarto tan opisina na abitlan eskuwelaan diad Dagupan tan Pozorrubio, untan met diad say kabiangan na Dagupan Campus ya apoolan nen kapigan labat lapud faulty electrical wiring.
Kasumpalan tonya, tampol met ya pinapaway iray estudyante tan tampol ya nangawa na inspection iray otoridad kaiba iray bomb sniffing dogs.
Kaleganan tonya, patuloy met ni gagaween ya imbestigasyon na Urdaneta City PNP ed say bomb threat ya angiter na paga ed saray manaaral na Panpacific University of North Philippines (PUNP) karuman na kabuasan.
Onong ed saray otoridad, karumay kabuasan, linmad sikara si Virgilio Bragas, security guard na abitlan eskuwelaan piyan ipaanta
so impakanegneng na improvised explosives device diad sakey ya CR na eskuwelaan.
Akabatan ya sakey ya criminology student ya kinabat ya si Ryan Lacaden so akanengneng ed say ibabagan pampasabog diad CR na saray lalaki diad North Gate Event Center na Panpacific University .
Kaleganan tonya, diad inpanrespondi na Special Weapons and Tactics Group o SWAT at Explosives and Ordinance Division na Pangasinan PPO diad baley na Lingayen, nala da so ibabagan pampasabog tan nangawa ra na tatawegen ya Field Safe Dismantling Procedure no iner adeskubren peke may IED .
Anggaman untan, pinmawil met lad normal so operasyon na abitlan eskuwelaan.
No nanonotan pigaran bolan la so apalabas nen bulabugen met na bomb threat so Urdaneta City National Highshool no iner peken pasabog so intilak diad CR na bibii.
