DAGUPAN CITY– Akibiang iray deboton Katoliko diad panuna na saray seminarians na Mary Help of Christians Seminaries ed ginawan Penitential Pilgrimage Walk manlapud San Jacinto Parish Church paunlad Our Lady of Manaoag Minor Basilica.
Kabansag iya na impanginonot ed ‘Day of Reparation’ ya indeklara nen Lingayen- Dagupan Archbishop Socrates Villegas bilang ikerew na pirdona ed Diyos ed say angga untundan pateyan diad bansa kaiba lay inpanpatey ed saray pigara lan parin Katoliko.
Diad homily to, imporek nen Archbishop Villegas ya aliwan panaon iya piyan untakot no ingen panaon iya pian magmaliw ya unsebeg so amin.
Bangbalet aliwan say panawit na armas singa say paltog so pangipanengneng na sibeg na too no ingen say kasil na linawa tan pananisia ed say Diyos.
Onong ed kinen Archbishop Villegas, labay dan mansulong na ambalangan kawes ya simbolo na dala lapud say pateyan ya nagagawa diad bansa bangbalet pinili dan mankawes na kolor purple ya pangipapanengneng na ikerew na pirdona ed saray kasalanan na saray totoo.
Karuman, June 18 so mika siyam ya agew manlapu nen pinatey si Fr. Richmond Nilo na Diocese of Cabanatuan.
