Pastor inatey, misis tonya akaligtas ed impamaltog diad Pangasinan

DAGUPAN CITY– Inatey so sakey ya pastor kasumpalan ya paltogen na saray agga kabat ya suspek diad ciudad na Urdaneta.

Kinabat so biktima ya si Bernabe Yong, 42 anyos tan residente na Brgy Poblacion ciudad na Urdaneta.

Onong ed impormasyon na kapulisan, manaakar so biktima kaibay asawa ton si Liza, 48 anyos nen asinggeran ira na duwaran lalaki ya lugan na motorsiklo insan ira pinapaltog.

Nakna na bala so nanduruman parte na laman na biktima legan ya maswerten agga apaltog so misis tonya.
Naibatik ni so biktima diad patambalan balet inatey la.

Arekober diad akagawaan na insedente so pituran basyo na calibre 45 ya paltog.

Malet ya imbestigasyon so gagaween natan na pupulis ed agawan insedente.