Daan lan togtog no ipasen.
Saya so imporek nen National Security Adviser Hermogenes Esperon Jr nilira ed impaway ya record na Armed Forces of the Philippines (AFP) nen kapigan labat no iner inmabot ed 513 ya kabataan so arecruit kono na CPP-NPA manlapud 1999 anggad 2019.
Diad ekslusibon impituyaw na Bombo Radyo Dagupan ed kinen Esperon, impalapag ton nen saman ni nawawalaan la na saray ‘recruitment’ na aray NPA diad nanduuman eskuwelaan kanyan ipapasen dan aliwa layan balon balita.
Inkuwanton dakel ya makakaliwang grupo so mantatangguyor ed saray estudyante ya magmaliw ya aktibista ed muran edad labat.
Diad katuwaan tonya, onong ed kinen Esperon, ogaw niya so naimatunan tolay pan oopresi na aray NPA ya mi miyembro ed sikara so sakey ya kaaro to.
Inkuwantonin legal nen saman iray organisasyon na makakaliwan grupo kanyan agga napapagaan so gobyerno ed sarayan klase na kurang.
Immuna ed saya, inter na AFP ed kinen Sen. Ronald dela Rosa, chairman na committee on public order and drugs so rekord ya mangibabagan 513 na aray katayakdang diad bansa so arecruit na saray makakaliwan grupo.
Diad 513 ya bilang na aray kalangweran, 362 ed saraya so simuko, 134 so narel tan 17 so apatey.
