DAGUPAN CITY—Pagalangan na Provincial Board si Shiela Marie Calonge de Guzman na Barangay Calaocan, Manaoag Pangasinan kasumpalan iyan nagin top 7 ed graduating cadets na Philippine Military Academy – Sanggalang ay Lakas at Buhay Para sa Kalayaan ng Inang Bayan SALAKNIB Class of 2017.
Oneng ed kinen Board Member Ajerico Rosario makapa-liket so ginawa nen De Guzman lapod say inpanengneng ton abilidad diad military schooling anggano sakey iyan bii.
Panaralan met na say Provincial Board so pangiter da ya monetary award ed sayan mangbalet maninisia iyan aprubaan met iya nen Pangasinan Governor Amado Espino III.
Aliwan say pamilya De Guzman labat kuno so maliket ed sayan inpakagamor to ya award nen Sheila no andi say buon luyag kasumpalan ya kabiangan iya ed top 10 ed saray mansumpal no Marso 12.
Si De Guzman et ipawit da ed Mindanao ya onaan na lugar na paka distino ton nia.
