DAGUPAN CITY-Dinepensaan na liderato na Pangasinan Provincial Hospital so nagmaliw ya alegasyon ed sikara na San Carlos PNP kasumpalan ya akatakas manlapud kustodiya da so suspek ed say impanpatey ed kinen datin San Carlos City Councilor Mienrado Ynzon.
Diad impituyaw na Bombo Radyo Dagupan ed kinen Dr. Aurelio O. Cariño, OIC Chief of Hospital na Pangasinan Provincial Hospital, impalapag tonya ya kada walay aawiten iran inmates diad ospital so obligado iray otoridad ya posasan iraya tan malet dam babantayan.
Bangbalet, onong ed say doktor, inawit na saray pulis so abitlan suspek diad ospital ya aglabay da binantayan.
Inkuwanton nen ginawa da so eksaminasyon so anggapo labat na anggano sakey ya pulis ya akila piyan manbantay.
Lapud saya, agmetla antay nannengneng ed say suspekj ya sakey manayan inmate.
Nilinew da met so nagmaliw ya alegasyon diad sikara na kabiangan na San Carlos PNP no iner agda aaboloyan ya makaloon so siopaman diad operating room kanyan agga agawaan ya bantayan na pulis na on-duty so suspek ya pasyente.
Inkuwanda da nayari da met ya makaloob diad kuwarto basta ibaga dan say pasyenten nenengnengen da so sakey ya inmate tan nakaokolan dan bantayan.
