DAGUPAN CITY– Unkerew na tulong ed saray National Offices so Provincial Government na Pangasinan lapud Habagat , bagyong Henry, Inday tan Josie ya nanpadelap ed baleg ya parte na probinsya.
Diad eksklusibon impituyaw na Bombo Radyo Dagupan ed kinen Pangasinan Governor Amado Pogi Espino, kokompletuen da la so terminal report ya gagaween da ed say danyos na delap diad probinsiya no iner base ed initial assesment da so unaabot ed masolok ya 1 bilyon pesos so danyos.
No saya so nasumpal la insan da ipawit diad National Offices ya labay dan kerewan na tulong lapud kabaleg ya probleman inter na say kalamidad ya tinawag dan “unprecedented”.
Diad kaplesan, mitotongtong lara ed saray makanepegan ya ahensya singa say DPWH piyan napantongtongan iray programan nepeg dan gaween ed say panapiger ed saray aderal ya taytay, dike tan saray karsada.
Anggaman linmeksab la so danum ed pigaran baley, dakel niray adelap ya low lying areas diad probinsya.
