DAGUPAN CITY– Malet ya isesebel so pangala na litrato ed kinen North Korean Leader Kim Jong-un ya kaplesan ya untutuloy diad St. Regis Hotel ed Singapore.
Saya so kinumpirma nen Bombo Correspondent Jose Paul Morales, tubon San Pedro Laguna tan masolok ya walon taon lan manaayam tan mantratrabaho diad airbus ed Singapore.
Inkuwanton sakey ya residente diad tutuluyan ya hotel nen Kim so angala na litrato balet insebel na security na North Korean lider tan tampol ton impabura diad say cellphone to.
Onong nid si Morales, no bilang agawa man diad North Korea so nayarin akumpiska la tan agla impawil so cellphone na samay residenten nanlitrato ed kinen Kim.
Kaleganan tonya, anggaman walay melag ya tsansa agga aboloyan na Singaporean government ya nawalaan na antokaman ya banta ed say seguridad na duwaran lider.
Paneknek dia so agga inaboloyan so sakey ya Australian citizen ya makaloob diad Singapore ta saya so datin terorista tan nanlapu ni diad Syria.
