DAGUPAN CITY– ‘Puro porma labat”.
Saya so nagmaliw ya palapag nen National Security Adviser Hermogenes Esperon Jr. ed saray manbabalaw tan unkokontra ed sakey taon ya extension na Martial Law diad Mindanao.
Diad impituyaw na Bombo Radyo Dagupan ed kinen Esperon impalapag ton singa agga natatalusan na pigaran oposisyon so tuwan makasengeg tan rason no akin inpakseb so extension na Batas Militar diad abitlan lugar.
Inkuwanton, kontra ed say immunan deklarasyon na saray militar ya walay kawayangan la ed saray bandidon grupo, wala ni uniiral ya rebelyon diad Mindanao.
Lapud tuloy nin sansia so panbabatikos, imbaga nen Esperon ya puro porma labat so gagaween ya pankokontra tan agga iyaboloy na saray pigaran human rights advocate tan militanten kongresista.
No nanonotan, inhain lamet na Korte suprema so sakey nin petisyon ya mankukuwestyun ed ligalidad na impamarukoy nen president Rodrigo Duterte na martial law diad Mindanao.
Diad say petisyon, imporek na aray human rights advocates tan militanten grupo na National Union of People’s Lawyers tan Bagong Alyansang Makabayan ya anggapoy basian na Martial Law Extension ya kaokolan diad silong na Konstitusyon.
Inyarum tonin, anggapoy legal ya basehan so impanparukoy na Martial Law diad Mindanao lapud asumpal la so giyera diad Marawi sanen Oktubre nen apalabas ya taon.
