DAGUPAN CITY-Disididon mangisegep na reklamo so pamilya na 11 anyos ya ogaw ya laki na inatey ed inpanbully tan pinantolongan ya binogbog na aray kagalaw ton puros menor de edad diad barangay Salay, Mangaldan, Pangasinan.
Kabat da la ray menor de edad ya responsable diad inpanbogbog ed abitlan biktima.
Edad ya 15, 13 tan 11 anyos iray responsable ed krimen.
Anggaman menor de edad so disidido nin sansia so pamilya ya mangisegep na reklamo.
Mangagawa la na kanepegan ya imbestigasyon so Municipal Social Welfare and Development Office kaibay PNP ta anggano menor de edad iray suspek et mangawa iray case study piyan naantaan so nansengegan na krimen.
Kaleganan tonya, kinerew na pamilya ya ipasilong ed otopsy so bangkay na biktima.
Immuna ed saya, base met la ed dalem na ogaw ed say ama to antes ya inatey, nen Dec 28 na labi diad kapegleyan na Christmas party diad lugar da so ginayugoy ya na saray kagalaw to diad ambilonget ya lugar tan diman da pinantolongan ya binogbog.
Bangbalet nen Enero 1 so nanpetang la tan sinmasakit la so interon laman to tan nen agga manguuman so kondisyon na laman to so inawit iya diad ospital no iner diman metla nauyusan na bilay.
