Iniuugnay ng Kilusang Mayo Uno sa kakulangan ng permanenteng trabaho at sariling industriya sa bansa ang pagtaas sa anim na porsyento ng unemployment rate noong Hulyo 2026, na katumbas ng tinatayang 3.14 milyong Pilipinong walang trabaho. Ayon sa grupo, hindi sapat ang mga pansamantalang oportunidad sa trabaho upang matugunan ang patuloy na pagdami ng labor force sa bansa.
Sinabi ni Jerome Adonis, National Chairperson ng Kilusang Mayo Uno, na patuloy na nakadepende ang ekonomiya sa mga dayuhang mamumuhunan habang kulang umano ang pangmatagalang programa para sa paglikha ng mga trabaho. Dahil dito, marami aniya sa mga manggagawa ang napipilitang maghanap ng oportunidad sa ibang bansa, habang nananatiling laganap ang mga trabahong pansamantala o kontraktuwal.
Kaugnay nito, nagpahayag din ng pagtutol ang grupo sa planong pagtatayo ng Pax Silica, na nakikita nitong hindi tumutugon sa pangangailangan para sa mga industriyang direktang makapagbibigay ng matatag at pangmatagalang trabaho sa mga Pilipino. Para sa grupo, kinakailangan ang mas malinaw na industriyalisasyon at mga programang nakatuon sa paglikha ng regular na trabaho sa halip na umasa lamang sa mga investment-driven na proyekto.
Samantala, binigyang-diin din ng grupo ang epekto ng pagbaha at iba pang kalamidad sa mga manggagawa na patuloy na pumapasok sa trabaho sa kabila ng masamang panahon. Ayon sa grupo, lalo nitong nagpapabigat sa kalagayan ng mga manggagawa na kinakailangang maghanapbuhay araw-araw habang nananatiling hamon ang sapat na kita at seguridad sa trabaho.
