Pinasimulan ng LGU San Carlos City, Pangasinan ang munting pagsalubong sa pagdiriwang ng National Women’s Month ngayong buwan ng Marso bilang pakikiisa sa pambansang kampanya para sa pagkilala sa lakas, kakayahan, at mahalagang ambag ng kababaihan sa lipunan.
Bilang bahagi ng selebrasyon, naglatag ang pamahalaang lungsod ng mga simbolikong aktibidad at pagpapakita ng suporta upang higit na maitaas ang kamalayan ng komunidad hinggil sa pagsusulong ng gender equality at women empowerment.
Layunin din nitong paigtingin ang pagpapahalaga sa papel ng kababaihan sa pamilya, pamayanan, at iba’t ibang sektor tulad ng edukasyon, kalusugan, negosyo, at serbisyo publiko.
Binigyang-diin ng LGU na ang pagdiriwang ng National Women’s Month ay hindi lamang simpleng selebrasyon kundi paalala ng patuloy na pakikibaka para sa pantay na karapatan, oportunidad, at paggalang sa bawat babae.
Kabilang din sa mensahe ng lungsod ang pagkilala sa dedikasyon at sakripisyo ng mga ina, manggagawa, lider, at kabataang kababaihan na nagsisilbing inspirasyon sa komunidad.
