DAGUPAN CITY- Hindi maaaring tanggihan ng senado na maging Impeachment court kapag kanilang matanggap na mula sa Kamara ang articles of impeachment laban kay Vice President Sara Duterte.
Ito ay matapos sabihin ni Sen. Panfilo “Ping” Lacson” na maaaring hindi mag’convene’ bilang impeachment court ang senado sa oras na maitaas na ng Kamara ang articles of impeachment.
Sa panayam ng Bombo Radyo Dagupan kay Atty. Joseph Emmanuel Cera, Consitutional Law Expert, hindi konstitusyonal ang hindi agarang pagsunod ng senado upang litisin ang naturang mga artikulo at desisyunan ang hatol nito.
Aniya, bahagi ng judicial faction ng senado ang pagiging impeachment court.
Kailangan itong paghandaan ng senado at imbitahan ang mga respondente, partikular na si Vice President Duterte kasama ang abogado nito, upang sagutin ang mga reklamo laban sa kaniya.
Hindi naman aniya naaayon kung ‘summary of judgement’ agad ang gagawin ng mga senador habang hindi napapakinggan ang mga ebidensya.
Inaasahan ang mga senador na lilitisin ang articles of impeachment at pagbotohan kung mauuwi sa ‘conviction’ ang bise presidente.
Gayunpaman, tiniyak naman ni Senate President Tito Sotto III na agarang magiging Impeachment court ang senado kapag kanilang natanggap na ang articles of impeachment mula sa Kamara.
