Humiling ang EU-ASEAN Business Council (EU-ABC) para sa mas matinding kampanya laban sa illicit trade o talamak na ilegal na kalakalan sa rehiyon.
Malaking pagkakataon umano ang pag-upo ng Pilipinas bilang ASEAN Chair sa 2026 para paigtingin ang laban sa illicit trade.
Sa ulat na “Driving ASEAN Action Against Illicit Trade” na isinumite sa gobyerno ng Pilipinas at ASEAN Secretariat, naglatag ang grupo ng blueprint para sa “Cooperation-First” strategies na naglalayong protektahan ang ekonomiya ng mga bansang kasapi ng ASEAN.
Ayon sa EU-ABC, akma umano ang posisyon ng Pilipinas para pangunahan ang pagbabantay sa mga trade route na pinapasok ng mga sindikato na sangkot sa pagpupuslit.
Malaking pondo ang mababawi umano ng gobyerno para sa mga serbisyo publiko Kung masusugpo ang talamak na illicit trade o ilegal na bentahan ng sigarilyo at vape.
Sinabi ni Senador Win Gatchalian, chairman ng Senate Committee on Ways and Means, nakaaalarma ang datos mula sa Bureau of Internal Revenue (BIR).
Taong 2024, pumalo sa P50 bilyon ang nawalang kita sa bansa dahil sa pagpupuslit ng sigarilyo at maling deklarasyon ng mga vape product.
Kabilang dito ang tinatayang P34.37 bilyon mula sa ilegal na sigarilyo, P14.84 bilyon mula sa misdeclaration ng vapor products and P840 milyon mula sa misdeclaration ng heated tobacco products.
Hindi lang ito problema ng Pilipinas kundi ng buong ASEAN na bilyon-bilyon din ang lugi kada taon habang lalong lumalakas ang mga sindikato at organized crime.
Sinuportahan naman ng EU-ABC ang mga reporma sa batas ng Pilipinas na maaaring maging modelo sa ASEAN kabilang dito ang Anti-Agricultural Economic Sabotage Law na nagpapataw ng mabigat na parusa sa malakihang smuggling, Preboarded Technical Verification (PTV) na nagsisiyasat sa mga kargamento bago pa man ito i-export para matiyak na ligal ang lahat at tobacco export rules na nagpapatupad ng tamang markings sa mga sigarilyong ilalabas ng bansa para iwas-puslit at diversion sa ibang merkado.
Sa Pilipinas lamang, umabot sa P13.9 bilyon ang tax leakage noong 2019.
Ito ay lumobo sa P48.3 bilyon noong 2023 at P54.1 bilyon noong 2025. Kung magpapatuloy ito, inaasahang aabot sa P65.9 bilyon ang tax leakage sa taong 2028.
