Kinompirma na PNP Police Regional Office I ya naipatunda la so operasyon na amin ya Philippine Charity Sweepstakes Office (PCSO) outlets diad interon Rehiyon Uno.
Diad impituyaw na Bombo Radyo Dagupan ed kinen Police Lt. Col. Mary Crystal Peralta, say spokesperson na PNP Region 1 impalapag ton tampol met iran inmonor ed gangan nen presidente Rodrigo Duterte ya ipatunda so operasyon na lotto, small town lottery (STL), keno, peryahang bayan tan amin ya gaming schemes ya walay permit manlalapud PCSO.
Inkuwanton, awalaan ira na augmentation force piyan ipatonton so direktiba na chief executive.
Impalapag nen Peralta, impasara da so apatiran Drawing Centers na STL diad Region I, STL outlets ya walad 84 ya bilang, Lotto Outlets ya wala ed 199 ya bilang , peryahan ng bayan tan Keno ya narumog diad luyag na Pangasinan.
Kaleganan tonya, nilinew na abitlan opisyal ya anggano naikapot lara so abitlan pasugalan, so tuloy nin sansia so panmonitor da.
Pinanonotan met nen Peralta so publiko ya aga la untayad jueteng tan arum nin sugal ta saraya so illegal tan walay dusad saray unsumlang diad ley.
Diad silong na Presidential Decree 1602, saray naerel ya sangkot ed ilegal ya sugal so nayarin panmultaen, mangawa na community service tan nakulong.
