DAGUPAN CITY– Manpapasalamat so sakey ya overseas Filipino worker o OFW kasumpalan ya ligtas ya akasempet ed say pamilya to diad baley na Alcala, Pangasinan.
Kabansan ya semmempet nen Marites Tacotaco ya taga Alcala so masolok ya 800 OFW diad Kuwait.
Say kuwanto niya, bangongot so inpantrabaho to diad Kuwait lapud nilikna ton inpanmaltrato ed sikato na say amo to.
Inkuwanto ya maminsan labat diad sakey simba ya mangan, sasakitan tan adagdawit lan sinaksak na anak na amo to.
Kinumpiska met na say agency to diad Kuwait so cellphone tan passport to.
Aga met iya aaboloyan ya makapaway diad abong.
Kanyan say mister to so kinmerew na tulong diad gobyerno piyan saya so makasempet.
Kaleganan tonya, impasiguro na Provincial Employment Services Office (PESO)ya itdan da na tulong pinansyal irat simmempet ya OFW diad Pangasinan.
