DAGUPAN CITY—Mangiwgiw ya angistorya diad Bombo Radyo Dagupan so sakey ya Pinay OFW diad Taiwan nen agawa diman so yegyeg.
Diad esklusibon impituyaw na Bombo Radyo Dagupan ed kinen Aime Jacinto ya tubon Nueva Era Ilocos Norte tan taloran taon lan mantratrabaho diad Hualien Taiwan, ginmalaw so salming na bintana diad abong na say amo to diad agawan maksil ya aftershock.
Legan ya maniistorya so aga naiyamot so kebyew tan takot to lautla mantuloy tuloy so alikna dan aftershock kayari na 6.4 magnitude ya yegyeg diad Taiwan nen imbeneg ya agew.
Halos agga makapansalita diad takot si Jacinto diad pangiwgiw to umpian naulit so maksil ya yegyeg lautla wala rad kumapat ya palapag na tutuluyan dan apartment.
Diad katuwaan tonya, legan ya pitutuyawan na Bombo Rayo Dagupan so pinay OFW so tuloy tuloy ni panyegyeg diad kulaan to.
Kaleganan tonya, impalapag nen Jacinto ya patuloy so pitutuyaw dad saray kapara dan Pilipino diad Taiwan piyan nasiguro so kaligtasan na balang sinansakey.
Say makapaermen balet, nalmo la so bangkay na samay Pinay ya aanapen dan si Melody Albano de Castro taga Abulug, Cagayan.
Akabatan na diad kumapiton palapag na Marshal Hotel a-trap si Castro.
