DAGUPAN CITY– Agni mansasalita anggad natan so naareston manunaan ya suspek ed say inpanpatey ed kinen Father Richmond Nilo diad Nueva Ecija.
Immuna ed saya, kinumpirma nen Philippine National Police Chief PDGen. Oscar Albayalde so impakaerel ed suspek ya si Adell Roll Milan ya residente na San Isidro, Nueva Ecija , asingger diad baley na Zaragosa no iner agawa so inpanpatey ed pari.
Diad eksklusibon impituyaw na Bombo Radyo Dagupan ed kinen PRO-3 regional police director CSupt. Amador Corpus, impalapag to ya agni natukoy so inpanpatey ed kinen Father Nilo ta angga nid natan agni mansasalita so suspek ya sangkot iya ed insidente.
Diad natan, patuloy iran mangagawa na background and profiling ed suspek ya si Milan piyan nawalaan ira na malaknaban ya impormasyon no siopa tan anton grupo so pikabiangan to.
Nakaokolan konon nakabatan iray kaiba to piyan nabuo da so aalotoren ya impormasyon tan pian naaresto so amin ya suspek.
No nanonotan, pinaltog na saray suspek si Father Nilo diad loob na simbahan kaleganan ya saya so manmimisa.
