DAGUPAN CITY – Mas eneletan na Dagupan City PNP so panbabantay ed saray tindaan piyan nasiguron ligtas iray siran ibababiyahe diad ciudad.
Saya et kasumpalan na inpakaerel na taloran truck na bangus ya agla tariwa ya nanlapu nid Western Pangasinan partikular diad baley na Anda.
Diad ekslusibon impituyaw na Bombo Radyo Dagupan ed kinen Police Supt. John Dale Sulit, hepe na Dagupan City PNP, impalapag ton saray akumpiskan banyeran bangus so positibo ed ‘fish kill’ ta sangkanengneng met ed senyales ton amputi lay asang tan alemek lay laman na sira.
Say katuwaan tonya, antes ya agawa so impakaerel ed taloran truck so akapangikurit la na parehon insidente nen agew na Biyernes- Hunyo 1.
Onong ed say opisyal, walay sakey ya truck so nangetman nanpuslit na saray fish kill ya sira ya akagetar ya ileksab ed saray tindaan diad ciudad na Dagupan.
Lapud anggapo met so naipanengneng ya auxiliary invoice ed saray kargan sira, apilitan iray manbabantay ya fishwarden ya papawilin ed nanlapuan dan lugar.
Diad kaplesan, mangagawa iray abot so opisina na Bureau of Fisheries and Aquatic Resources o BFAR iyan diman ibantak iray akumpiskan botchan bangus.
No nanonotan, akaranas na malaknaban ya fishkill so baley na Anda no iner unaabot ed 86 milyon pesos so kantidad na danyos.
