Sa kabila ng ipinatupad na malaking rollback sa presyo ng mga produktong petrolyo ngayong linggo, nananawagan pa rin ng mas malaking bawas-presyo ang mga tsuper upang kahit papaano ay gumaan ang kanilang gastusin sa araw-araw na pamamasada.
Ngayong Nobyembre 10 hanggang 16, bumaba ng labing-anim na piso at walumpung sentimos kada litro ang presyo ng gasolina, apat na piso at sampung sentimos naman sa diesel, at tatlong piso at pitumpung sentimos sa kerosene.
Bagama’t malaking bawas ito, hindi pa rin nangangahulugan na tuluyan nang gumaan ang kalagayan ng mga tsuper, lalo na ang mga jeepney driver na araw-araw umaasa sa kanilang pasada upang may maiuwi sa kanilang pamilya.
Para kay Rex Bautista, isang jeepney driver mula sa Barangay Bonuan Gueset sa Dagupan City, hindi sapat ang maliit na rollback kung ikukumpara sa malalaking pagtaas na kanilang nararanasan sa presyo ng diesel.
Ayon sa kanya, malaking bahagi ng kanilang kinikita ang napupunta sa panggastos sa pamamasada, kaya kapag mataas ang presyo ng langis, mas kaunti ang natitira sa kanilang kita.
Ibinahagi rin ni Bautista na hindi pare-pareho ang kanilang kinikita sa isang araw. Kapag malakas ang pasada, maaari siyang makapag-uwi ng limang daan hanggang pitong daang piso. Ngunit kapag mahina ang biyahe, umaabot lamang sa dalawang daan hanggang tatlong daang piso ang kanyang naiuuwi matapos ang buong maghapon.
Dahil dito, umaasa siyang mas lakihan pa ang mga susunod na rollback upang hindi lamang mabawasan ang kanilang gastusin sa diesel kundi magkaroon din sila ng sapat na perang maibibigay sa pangangailangan ng kanilang pamilya.
Sa kabila ng malaking rollback sa presyo ng langis, nananatiling hamon para sa mga tsuper ang pagkakaroon ng sapat na kita para sa kanilang pang-araw-araw na pangangailangan.
Umaasa silang magtuloy-tuloy ang pagbaba ng presyo ng mga produktong petrolyo at mas lakihan pa ang mga susunod na rollback upang mas maramdaman ang ginhawa sa kanilang pamamasada at may maiuwi silang sapat para sa kanilang pamilya.
