DAGUPAN CITY- Sugatan man ang puso ng mga tagasuporta ni dating pangulong Rodrigo Duterte sa muling pag-deny sa interim release nito, patuloy pa rin magpapakita ng matinding suporta ang mga ito.
Sa panayam ng Bombo Radyo Dagupan kay Amik Garceniego, Vice Chairman ng United Filipinos Global-UK, sa darating na linggo ay magsasagawa sila ng rally sa Marble Arch sa London.
Aniya, magkakaroon din ng rally ang ibang grupo sa harapan naman ng Philippine Embassy sa parehong bansa.
Panawagan ni Garceniego sa kapwa tagasuporta, hindi pa sila talunan at ang tunay na laban ay ang kanilang paninindigan sa hurisdiksyon.
Aniya, patuloy silang maniniwala sa kapangyarihan ng dasal at patuloy na tititindig hanggang sa makuha ang makatarungang desisyon para sa dating pangulo.
Samantala, hindi nila maitanggi ang kalungkutan at pagkadismaya sa muling hindi pagtanggap sa interim release ni dating Pangulong Rodrigo Duterte subalit, buong tinatanggap nila ito.
Aniya, naiintindihan nila ang hindi pagdalo ng dating pangulo sa pagdinig at maaaring hindi kagustuhan nito na maging sentro ng usap-usapan ang pisikal na panlabas.
