DAGUPAN CITY- ‘Dasal kontra kurapsyon’
Ipinakita ng Epiphany of Our Lord co-Cathedral Parish Church sa bayan ng Lingayen ang kanilang pagsuporta sa Trillion Peso March upang ipanawagan rin ang pagpapanagot sa mga sangkot sa lumalalang kurapsyon sa bansa.
Ayon kay Fatima Esteban, Choir Accompanies sa nasabing simbahan, pagboses sa pamamagitan ng pagdasal ang kanilang sandata laban sa korapsyon at kailanman ay hindi sila gagamit ng dahas.
Sa kanilang pakikilahok sa Trillion Peso Rally, nagsagawa sila ng vigil prayer at candle lighting matapos ang kanilang regular mass, kung saan ang mga miyembro rin ng kanilang simbahan ang karamihang lumahok.
Ani Esteban, bilang simbahan, bahagi pa rin sila ng estado ng Pilipinas at sa pamamagitan ng simbahan, magsisilbi rin silang boses upang labanan ang lumalalang kurapsyon sa bansa.
Bilang isang kabataan, nais pa rin nilang tumindig bilang pag-asa ng bayan at maging isa sa pagwakas sa pagbubulag-bulagan mula sa panloloko ng gobyerno.
Aniya, maging silang kabataan ay ramdam ang pagtaas ng mga bilihan at hindi tamang paggamit sa mga buwis na maging sila ay nagbabayad.
Panawagan naman ni Esteban ang pagmulat ng bawat mata sa katotohanan at panagutin ang mga dapat managot.
