DAGUPAN CITY– Impasiguro nen Magdalo Partylist Rep. Gary Alejano, ya tutukan to so isyu na pangipatonton na Martial law diad Mindanao.
Saya so impalapag na opisyal diad eksklusibon impituyaw na Bombo Radyo Dagupan, kasumpalan ya aprubaan diad ginawan joint session na duwaran kapulungan na Kongreso so kerew nen presidente Rodrigo Duterte ya palaknaben so martial law tan say suspension na privilege of habeas corpus diad Mindanao ed mikatlon pankanaw nawa.
Kaleganan tonya, impalapag nen Rep. Alejano, ya propaganda labat na kaplesan ya administrasyon ya lapud Martial law so unlalagoy ekonomiya na Pilipinas piyan nakondisyon so utek na totoo piyan nagnap ya naipatonton so Martial Law diad interon bansa.
Impalapag nen Alejano ya ipapanengneng labat na Martial law diad International Community ya walay gulo diad bansa tan agga nasarag ya aksyunan na gobyerno tan saray otoridad.
Inkuwanton anggan ener ya nengnengen say panpalaknab ed saya so agga makatulong.
