Dagupan City-Tinangguyor na Land Transportation Franchising and Regulatory Board o LTFRB Region 1 so publiko partikular saray pasahero ya laen so plate number na saray jeep ya man ‘overcharging’ o atagey so singil na pasahe.
Onong ed kinen LTFRB Regional Director Narsudin Talipasan, walay kanepegan so siopaman ya mandalem no walay mangitagey na singil ed pasahe.
Inkuwanton simple labat so gaween na saray pasahero ed panreport dad saray abusadon jeepney drivers.
Laen da labat so plate number odino body number na jeep tan iter ed LTFRB.
Saya so usaren na abitlan opisina piyan nakabatan so driber na jeep tan saya so pakseban na dusa.
Immuna ed saya, pigaran pasahero la so nanreklamo diad Bombo Radyo Dagupan ya kaslakan lan luluganan ya Public Utility Vehicles o pampasaheron jeep so nantagey na pamasahe.
Say datin otso pesos ya pasahe so ginawa lan samploy pesos.
Naaruman met na talo anggad limay pesos so singil ed arum ya pasahero ya manlalapu ed arum nin baley paunla diad syudad na Dagupan.
