DAGUPAN CITY – Limaran managsigay so inerel na saray kabiangan na Bantay Dagat makasengeg ed pansigay da diad fish sanctuary diad baley na Sual, Pangasinan.
Saray narel so kinabat ya sikara di Jay-R Carrera, 19 anyos, Mark Greg Carrera, 25 anyos, Ramil Ramirez, 31 anyos, William Estacio, 45 anyos tan Orly Estacio, 38 anyos, parehon manaayam diad Agoo, La Union.
Onong ed impormasyon, mangagawa na seaborne patrol iray membro na Bantay Dagat diad barangay Cabalitian ed abitlan baley nen anengneng irayan managsigay ya akalugan diad taloran motorized banca.
Akumpiska ed saranya so taloran motorized boat, taloran coolers, taloran set na net tan samploran kilo na nanduruman klase na sira ya mankantidad na P800.
Saray managsigay so wala lad kustodiya na Sual PNP tan akagetar ya isegepan na kaso.
Akabatan ya say lugar ya akaerelan ed sarayan managsigay so indeklaran fish sanctuary ya malet ya isesebel ya pangalaan na sira.
