DAGUPAN CITY- Pinatibay ng lokal na pamahalaan ng San Nicolas ang pakikipagtulungan nito sa Kabalikat Civicom Association Inc. – San Nicolas upang mas mapabilis at mapahusay ang serbisyong pampubliko sa bayan. Kamakailan lamang ay bumisita ang mga opisyal ng Kabalikat Civicom sa opisina ng San Nicolas upang ipahayag ang kanilang patuloy na suporta at pakikipagtulungan sa mga programa at proyekto ng munisipyo.
Ayon sa alkalde, mahalaga ang epektibong komunikasyon at pagkakaisa ng iba’t ibang organisasyon upang mas maayos na maasikaso ang pangangailangan ng mga mamamayan at mapabilis ang pag-unlad ng San Nicolas.
Lubos ang pasasalamat niya sa Kabalikat Civicom sa kanilang patuloy na dedikasyon sa paglilingkod-bayan.
Ipinangako naman ng bagong tagapangasiwa ng Kabalikat Civicom na higit nilang pag-iibayuhin ang kanilang pakikipagtulungan sa LGU at sisiguraduhin ang mabisang komunikasyon at koordinasyon sa pagitan ng dalawang organisasyon.
Layunin nilang maging aktibong kasosyo sa pagkamit ng mga layunin ng lokal na pamahalaan para sa ikauunlad ng bayan.
Ang pagkakaisa ng LGU San Nicolas at Kabalikat Civicom ay isang malaking hakbang tungo sa mas mahusay at mas mabilis na pagtugon sa mga pangangailangan ng mga mamamayan.
Inaasahan na ang pakikipagtulungang ito ay magbubunga ng mas maraming proyekto at programa na makikinabang sa buong komunidad.
