Dagupan City – Nagsagawa ng pamamahagi ng suplay ang lokal na pamahalaan ng Dagupan sa Barangay Malued, bilang bahagi ng direktang serbisyo para sa mga residenteng patuloy na naaapektuhan ng kalamidad at pabago-bagong panahon.
Pinangunahan ng LGU ang operasyon sa tulong ng mga barangay official, council members, at volunteers. Kabilang sa mga isinagawa ay libreng konsultasyon, check-up, at pamamahagi ng gamot at bitamina partikular na para sa mga batang nasa panganib ng impeksyon, at mga senior citizens na may mga dati nang iniindang karamdaman.
Bahagi rin ng aktibidad ang distribusyon ng mga kagamitang pantulog gaya ng banig at sleeping mats para sa mga pamilyang hirap pa ring makarekober mula sa mga nagdaang pagbaha.
Ayon sa mga kinatawan ng lungsod, hindi ito one-time event kundi bahagi ng seryeng community outreach program na layong abutin ang mga komunidad na madalas naipagkakait ng serbisyong medikal dahil sa lokasyon o limitadong access.
Dagdag pa rito, binigyang-pansin din ang pag-iwas sa water-borne diseases gaya ng leptospirosis at dengue na karaniwang tumataas ang kaso tuwing tag-ulan.
Tiniyak naman ng lokal na pamahalaan na magpapatuloy ang mga ganitong aktibidad sa iba pang barangay sa lungsod. Bukod sa pagbibigay-serbisyo, layon din ng programang ito na palakasin ang ugnayan ng pamahalaan at ng mga residente, at tiyaking walang komunidad ang mapag-iiwanan sa panahon ng krisis.
