Patay ang isang 24 anyos na lending collector matapos bumangga ang minamanehong motorsiklo sa isang mixer truck sa provincial highway ng Brgy. Buenlag sa bayan ng Mangaldan, Pangasinan.
Sa inisyal na imbestigasyon ng kapulisan, tinatahak ng biktima na kinilalang si John Carl Montemayor na residente sa bayan ng Calasiao ang kahabaan ng naturang kalsada at nasa kasalungat na lane naman ang truck na minamaneho ni Jimmy Eugenio na residente naman ng Brgy. Alitaya sa Mangaldan.
Kita rin mula sa CCTV footage sa mismong pinangyarihan ng insidente na tila bahagyang nawalan ng kontrol sa manibela ang driver ng motorsiklo kung saan napunta ito sa kabilang lane ng kalsada hanggang sa sumalpok na ito sa paparating na mixer truck.
Dahil sa lakas ng impact nakaladkad pa ng truck ang biktima kung saan nagtamo ito ng malalang pinsala sa kaniyang katawan na naging sanhi ng kaniyang agarang pagkamatay.
Samantala, nasa kustodiya naman ngayon ng Pnp ang driver ng truck at patuloy ang ginagawang imbestigasyon ng mga otoridad.
