DAGUPAN CITY– Akagamor na sugat diad nanduruman parte na laman to so 46 anyos ya laki kasumpalan ya sinaksak na sakey ya managsigay usar so sakey ya apisit ya bote diad Brgy Carael West siyudad na Dagupan.
Kinabat so biktima ya si Willie Abarcar, 46 anyos, walay asawa legan ya kinabat so suspek ya si Francisco Cayabyab, 48 anyos, managsigay tan parehon residente diad abitlan lugar.
Onong ed inisyal ya imbestigasyon na Dagupan City PNP antes ya agawa so insidente mantatalaran na luganan ton tricycle so biktima nen asinggeran na suspek tan awalaan ira na komprontasyon.
Kayari na sangsangan da so sikaray nanponitian tan diad saman ya pankanawnawa so inmasingger so menor de edad ya anak na suspek tan inter to so natsit ya bote ya sikatoy inusar ton inpansaksak ed say biktima.
Nen sinmabi ray pupulis, positibon inturo na saray akaimaton ya residente so suspek ya responsable ed say inpansaksak ed biktima.
Inbatik so biktima diad sangka asinggeran ya patambalan legan ya say suspek so unaarap ed kason Attempted Homicide.
Say menor de edad balet ya anak na suspek ya akapibiang ed insidente so inpalima diad kustodiya na DSWD.
