Dagupan City-Naalarma so Pangasinan Provincial Health Office lapud maples ya indakel na kaso na leptospirosis diad probinsya.
Onong ed PPHO, manlapud bolan na Enero anggad Hulyo inmabot la ed 61 so nikurit dan kaso na leptospirosis, mas atagey na 39 percent ed say nakurit ya 44 nen apalabas ya taon.
Labindua met dia so inatey ed abitlan sakit.
Kabiangan ed saray baley ya akapangikurit na atagey ya bilang na leptospirosis et say baley na Manaoag, Sual, Mangaldan tan Urdaneta City.
Iilaluan na PHO ya naaruman ni kaso na leptospirosis diad luyag ta agni asumpal so panaon na mamauran.
Lapud saya, malet natan so kampanya na PHO tan say panpapanonot ed saray residente ya agga babaliwalaen iray sintomas singa say petang, ampusisaw ya kolor na baog tan say pansakit na bikking.
