DAGUPAN CITY-Naalarma so Provincial Health Office ed intagey na kaso na leptospirosis diad luyag na Pangasinan.
Base ed datus na PHO, tinmagey na 135 percent so kaso na leptospirosis diad probinsya.
Onong ed kinen Provincial health officer Dr. Ana Marie de Guzman, manlapud bolan na Enero anggad August na kaplesan ya taon so inmabot la ed 207 so kaso na leptospirosis no iner 26 la so inatey.
Saya et mas atagey kumpara ed 88 ya kaso tan 13 ya inatey nen imbeneg ya taon.
Kaleganan tonya, akatutok ira ed saray baley tan ciudad ya walaad watchlist ya walay sangkadakelan ya kaso na leptospirosis.
Sarayan baley so pibiangan na baley na Binmaley ya akapangikurit na 23 kaso, Calasiao ya walay 9 ya kaso, Mangaldan ya walay 9 ya kaso, San Fabian ya walay 8 kaso, Mangatarem tan Sual ya walay tif 7 ya kaso, Manaoag, ciudad na San Carlos tan Santa Barbara ya walay tig anemiran kaso, untan met say Aguilar, Lingayen tan Urdaneta city ya walat tig limaran kaso.
Nilira ed saya, kinerew nen de Guzman diad publiko ya no makalikna na petang tan alipunga o antokaman ya sugat diad sali so tampol ya manpanengneng ed clinic.
