DAGUPAN CITY-Mansasansian agni kabat iray suspek ya nandukot ed duwaran Nursing Aid na Region 1 Medical Center nen bolan na Marso.
Diad impituyaw na Bombo Radyo Dagupan ed kinen Police Inspector Ador Tayag, spokesperson na Special Investigation Task Group ya manbebenben na abitlan kaso, impalapag ton agni ra akala na impormasyon nilirad sikara di Rizaldy Decano tan John Mark Payaoan parehon empleyado diad R1MC.
Inkuwanton, nanairapan niran sansian kabaten iray suspek tan say motibo na inpandukot ed sikara.
Inamin met na opisyal ya wala lay persons of interest bangbalet agdani insapubliko so ngaran daranya.
Diad kaplesan, patuloy so gagaween ya follow up tan background investigation na say intelligence group tan say PNP Dagupan parad say maganon pakaresolba na asalitan kaso.
