DAGUPAN CITY- Wala na umanong ibang option ang kampo ni dating pangulong Rodrigo Duterte kundi humarap na sa pagdinig ng kaniyang kaso.
Ayon kay Atty. Joseph Emmanuel Cera, Costitutional Lawyer, sa panayam ng Bombo Radyo Dagupan, hindi rin naman mapagbibigyan sa house arrest si Duterte kahit mapatunayan nitong ‘unfit to stand trial’ bagkus ililipat lamang siya sa naaayon na pasilidad.
Aniya, mas matutuloy din ang pagdinig at ang pagpresenta ng mga ebidensya kapag napatunayan naman na walang katotohanan na nakalimot na ang dating pangulo.
Giit niya, anuman ang mangyari o gawin pa ng mga abugado ni Duterte ay magtutuloy-tuloy ang proceedings kahit pa magiging matagal pa ang proseso nito.
Naniniwala naman si Atty. Cera na nagkakaroon ng delaying tactics ang kampo ni Duterte dahil nakita na ng mga ito ang mga ebidensya.
At aniya, kinakatakutan ng kampo na masiwalat sa publiko ang mga alegasyon laban sa dating pangulo.
Samantala, pinatotohanan niya ang pagiging ‘flight risk’ ni dating pangulong Duterte dahil sa may impluwensya pa ito kahit na may edad na.
Bagay na maaaring salik sa pagtago nito kung sakaling mapagbigyan sa interim release nito.
