DAGUPAN CITY- Nakilahok ang Kabataan Partylist-Pangasinan sa Trillion Peso March 2.0 na ginanap sa St. John the Evangelist Cathedral sa Dagupan City.
Bilang pakikiisa sa panawagan ng simbahan laban sa korapsyon at katiwalian, nanalangin at nagtirik ng kandila ang mga raliyista sa harap ng simbahan.
Kasabay nito, isinigaw din nila ang panawagang pagpapanagot at pagkulong sa mga kurakot, na ipinakita rin sa mga plakard na kanilang hawak.
Ayon kay Angelo Tijoso, koordinator ng Kabataan Partylist-Pangasinan, nakikiisa sila sa panawagan ng simbahan na managot ang mga “korakot, sinungaling, at mamamatay tao,” at iginiit na dapat managot ang lahat ng sangkot, “hanggang sa tuktok.”
Binigyang-diin ni Tijoso ang problema ng pagbaha sa Pangasinan.
Saad pa nito na, pang-siyam ang Pangasinan sa may pinakamalaking pondo para sa flood control, ngunit patuloy pa rin ang pagbaha na nakaaapekto sa mga kabataan.
Maraming estudyante aniya ang napipilitang lumiban sa klase, at ginagamit pa ang mga paaralan bilang evacuation centers.
Dagdag pa niya, hindi nabibigyan ng sapat na pondo ang mga serbisyong dapat sana’y nakakatulong sa mga mamamayan.
Malakas din ang panawagan ng grupo para sa agarang pagbibitiw sa pwesto nina Pangulong Marcos at Bise Presidente Duterte, dahil sila rin umano ang nanguna sa pag-apruba ng mga budget sa bansa.
Ipinunto ni Tijoso na sila ang nanguna sa “unprogrammed appropriations” at sina Sara Duterte at Marcos Jr. ay bahagi ng “bulok na sistema” kung saan iilan lamang ang nakikinabang.
Binigyang-diin din ni Tijoso na hindi matatapos ang kanilang pagkilos sa November 30.
Nagbabala siya sa gobyerno na hindi titigil ang Kabataan Partylist at ang sambayanan sa paglaban sa korapsyon at panawagan para sa tapat na serbisyo.
Sa kabuuan, naging maayos at matiwasay ang rali dahil sa pagtutok ng kapulisan, bfp at ilang mga boluntaryo para pangasiwaan ang kaganapan at hindi din naman gaanong marami ang sumama kung ikukumpara noong buwan ng setyembre sapagkat ang ilang “peaceful rallies” ay isinagawa na lamang sa bawat barangay o parokya ng simbahan para mapalakas ang sigaw sa paglaban sa korapsyon.
