DAGUPAN CITY- Hindi na nagawa pang umabot sa ospital ang isang 25 taon gulang na lalaki sa bayan ng Pozorrubio matapo itong pagbabarilin ng hindi pa nakikilalang suspek.
Ayon kay PCapt. Philip Pulmano, Deputy Chief for Admin ng Pozorrubio MPS, kinilala ang biktima na si Kryss Jan Poseliro, isang cook, at residente ng Brgy. Batakil, sa parehong bayan.
Sa kanilang imbestigasyon, alas otso nitong nakaraang araw lamang nang maganap ang insidente. Nakaupo lamang ang biktima sa labas ng kaniyang pinagtatrabahuang restaurant sa Brgy. Alipangpang sa naturang bayan nang bigla na siyang barilin ng dalawang suspek na agaran din tumakas sakay ng motorsiklo.
Idineklara namang dead on arrival ang biktima dahil sa natamo nitong tama sa kanang bahagi ng kanyang dibdib na tumagos sa likod at nagresulta ng kanyang pagkamatay
Samantala, nakuha naman sa pinangyarihan ng insidente ang isang caliber 45 live ammunition,isang spent shell, and isang deformed slug.
Sa ngayon ay wala pang malinaw na impormasyon ang mga otoridad sa nangayring insidente at patuloy pa rin na pinaghahanap ang mga suspek.
