DAGUPAN CITY– Maliket so pigaran dumaralos ya manlalapud baley na Malasique, Pangasinan ed opisyal ya inpandeklara na PAGASA na rainy season kasumpalan na agawan inpan uran tan inkiwala na Southwest monsoon.
Onong ed kinen Malasique Councilor Tony Espinoza, chairman na Committee on Agriculture diad abitlan baley, inkuwanton makatulong ya baleg ed saray dumaralos so interter na uran piyan nadanuman iray amamagan taneman na pagey lapud aliknan petang nen apalabas iran bolan.
Inkuwanton pinmabor ed saray dumaralos so pan-uran ta aglara manproblema ed paranum ed say dadalusan da.
Agmet la ra mannonot na kaaruman ya gastos parad gasolina na makinaryan usaren da diad pantanem.
Kaleganan tonya, idadasal met na saray totoo ya nepeg ya tuloy tuloy so pan–uran piyan nagnap ya nasalog iray tamtanaman.
