DAGUPAN CITY– Matalonggaring so sangkaunaan ya Himig Hataw 2018 ng Bombo Radyo at Star FM bilang pikakasakey ed Bangus Festival diad ciudad na Dagupan.
Dakel ya totoo so nambantay ed abitlan competition ya akibiangan na pituran contestant ed singing Competition tan anemira diad dance competition.
Nan kampeon diad Himig si Jessel Lambino na barangay Lucao, Dagupan City.
Diad ekslusibon impituyaw na Bombo Radyo Dagupan, impalapag ton agto ilaluan ya saya so mankampeon.
Say apanaluan ton P8,000 so para ed pan tuition na saray agagi to.
Say payo to ed saray kapara ton walay talento diad panagkansyon ya ipaway o ipanengneng so kamaongan da ya impangarod sikara na Diyos.
Apilin first runner up si Margareth Jimenez.
Impalapag ton, ag iya sinmuko tan nanpractice labat piyan naabot to so piugagep to.
Kaleganan tonya, parad kinen Tyra Loraine Vinluan ya second runner up, baleg yan oportunidad piyan naipaway to so talent to diad panagkansyon.
Agto ilaluan ya manalo met ta maong iray akalaban to.
Lapud kamaong na aray contestant diad Himig kanyan agawa so showdown iray contestant number 2, 4, 5 tan 7.
Diad sayaw, nankampeon diad Hataw so grupong Underdawgs.
Onong ed kinen MJ Espinosa ya sakey ed saray membro na dance group, sobran liket na grupo ed inpanalo da.
Pinantaryaan dan maong so kompetisyon tan lapud saya sikara so analo na cash ya P14,000.
Analon first runner up so 7th rage.
Onong ed grupo, ginawa dan amin piyan sikara so manalo.
Kaleganan tonya, agay lay liket na grupon Big Cheese ya apilin second runner up.
Onong ed grupo, saya so sangkaunaan ya inpila dad grupo tan sangkaunaan ya pankanawnawan akila ra ed sakey ya baleg ya event.
Say Himig Hataw 2018 na Bombo Radyo tan Star FM so bilang pikakasakey ed Bangus Festival diad ciudad na Dagupan.
