DAGUPAN CITY– Posiblen magmaliw ya membro na private armed groups iray gun for hire syndicates.
Saya so impalapag mismo diad Bombo Radyo Dagupan nen PSupt Mary Crystal Peralta, Regional Public Information Officer na Police Regional Office 1 o PRO1.
Onong ed kinen Peralta, nepeg ya magmaliw ya alerto so publiko partikular iray ‘local politicians’ ed saray abitlan sindikato lalot la agga mandumaan so gegemtan da ya mamatey na saray indibidwal o saray kabat iran pulitiko.
Immuna lan impalapag nen Peralta ya walay inactive private armed group ya babantayan da diad Rehiyon Uno.
Impalapag met nen saman nen PNP Spokesperson PCSupt. Benigno Durana Jr., walay 77 active PAGS diad bansa. 72 dia so manlalapud ARMM tan sansakey diad Region 1, Region 3, Region 4a, Region 5 tan Cordillera.
Saraya kuwanto so walay masolok ya duwan libon miyembro tan walay emben ya masolok ya sanlibo tan limanlasus ya paltog.
