Grade 1 pupil, kritikal nen abangga na van

DAGUPAN CITY—Kritikal ed ospital so sakey grade I pupil ya abangga na van legan ya pabeltang ed kalsada diad baley ya Labrador, Pangasinan.

Pasempat la ed abong so biktiman si Jorge Bolasoc, residente na barangay Bongalon nen agawa so aksidente.

Pabeltang ed kalsada diad petek na chapel ed barangay da so biktima nen abangga iya na van na mamanehoen nen Jose Dela Cruz, 43, residente ed barangay Paldet diad baley na Sison.

Binmantak ni ya pigaran metro so kalsada ed biktima ya akagamor na sugat ed nanduruman parte ya laman ton nia.

Naibatik met ni iya ed ospital diad baley ya Lingayen balet inyalis da ed Region I Medical Center ed syudad na Dagupan.

Wala la balet ed kustodiya na pulis so driver na van ya naaarap la ed kaso.