Gale warning mansasansia nid Western Seaboard na bansa-OCD region 1

DAGUPAN CITY– Nanpasakbay so Office of the Civil Defense o OCD Region 1 ed saray sumisigay ya mansasansia ni so gale warning diad Western Seaboard na bansa.

Diad eksklusibon impituyaw na Bombo Radyo Dagupan ed kinen Mike Sabado, spokesperson na OCD region 1, pinasakbayan toray sumisigay ya agnira uunlad taew ta baleg so daluyon tan atagtagey ni danum diad dayat.

Impalapag tonya ya agto nasisiguro anggan kapigan man sansia so gale warning ta manlalapoy pakabat diad PAGASA tan ipapalapag da labat diad totoo.

Inkuwanto ni ya nengnengen iray impormasyon diad facebook tan info boards tan diad saray text messages.