Nanawagan ang Federation of Free Workers sa mga pribadong employer na ibigay nang mas maaga ang 13th month pay ng mga manggagawa at hindi na hintayin ang itinakdang deadline sa Disyembre 24, upang lubos itong mapakinabangan para sa mga gastusin ngayong Kapaskuhan. Ayon kay FFW Vice President Julius Cainglet, mas makabubuti kung maibibigay ito bago pa man ang mga sale at pamimili ng regalo, at binigyang-diin din niya na naaayon sa batas ang paalala ng DOLE ukol dito, kabilang ang pro-rated na 13th month pay para sa mga hindi nakabuo ng isang taon sa kumpanya at maging sa mga nag-resign o natanggal sa trabaho.
Ipinaliwanag din ni Cainglet na ang batayan lamang ng pagkwenta ng 13th month pay ay ang basic salary, at hindi kasama rito ang mga allowance, komisyon, at incentives, kaya mahalaga ang anumang dagdag-sahod na maipapasok sa basic pay. Kaugnay nito, suportado ng FFW ang panukalang itaas sa 350,000 pesos ang income tax exemption threshold at gawing tax-exempt ang 13th month pay at iba pang bonus, dahil magpapalaki ito sa take-home pay ng mga manggagawa. Aniya, mas mainam pa kung aabot ito sa 500,000 pesos, lalo na at umaabot na sa mahigit 1,300 pesos kada araw ang kinakailangan ng isang pamilyang may limang miyembro para sa disenteng pamumuhay.
Binatikos din ng FFW ang pahayag ng NEDA na sapat umano ang 22 pesos kada meal, na anila ay hindi man lang sapat para makabili ng isang cup ng kanin at lalong hindi makapagbibigay ng masustansyang pagkain. Ayon kay Cainglet, maling-mali ang naturang kwenta at tila ginagamit lamang upang pigilan ang nararapat na dagdag-sahod para sa mga manggagawa, sa gitna ng patuloy na pagtaas ng presyo ng bigas, langis, at kuryente.
Ikinabahala rin ni Cainglet ang taun-taong reklamo ng mga manggagawang hindi natatanggap sa oras ang kanilang 13th month pay, habang ang iba ay pinagpapaliban pa ito matapos ang Bagong Taon. Aniya, malaking hamon ito sa DOLE at sa mga labor inspector nito na tiyakin ang pagsunod ng lahat ng employer, dahil ang pagbibigay ng benepisyong ito ay itinakda ng batas at hindi dapat ipagkait o ipagpaliban.
Sa huli, pinuna rin ng FFW ang paghahanda ng gobyerno para sa 2026 ASEAN Leaders Summit, na anila ay nakatuon lamang sa pagpapaganda ng imahe ng bansa ngunit napabayaan ang maliliit na negosyo at informal economy. Ayon kay Cainglet, lugi ang mga karinderya at maliliit na tindahan dahil sa mga idineklarang walang pasok, habang wala namang ibinibigay na kapalit sa nawalang kita, kaya iginiit niyang kung hindi kayang pondohan nang maayos ang ganitong pagho-host ay mas mainam na gawing simple na lamang ang preparasyon at unahin ang kapakanan ng mga manggagawa at mamamayan.
